Թեհրանի Մէջ. Հանդիպում` Հայաստանի Եւ Իրանի Նախագահներուն Միջեւ
Իրան տուած աշխատանքային այցելութեան շրջագիծին մէջ Հայաստանի նախագահ Սերժ Սարգսեան
երէկ Թեհրանի մէջ հանդիպում ունեցաւ Իրանի նորընտիր նախագահ Հասան Ռուհանիի հետ: Հայաստանի
նախագահին պաշտօնական կայքէջը կը հաղորդէ, որ հանդիպման սկիզբը Ռուհանի շնորհակալութիւն
յայտնեց Սարգսեանին հրաւէրը ընդունելու եւ իր երդմնակալութեան արարողութեան մասնակցելու
համար: Հայաստանի նախագահը անգամ մը եւս շնորհաւորեց իրանցի իր գործընկերը եւ մաղթեց
բեղմնաւոր աշխատանք ու յաջողութիւն այդ բարձր եւ պատասխանատու պաշտօնին համար: Հանդիպման
ընթացքին քննարկուեցաւ ինչպէս երկկողմանի, նոյնպէս ալ բազմակողմանի յարաբերութիւններուն
վերաբերող հարցերու լայն շրջանակ: Զրուցակիցները ընդգծեցին, որ հայ-իրանական համագործակցութեան
օրակարգը բաւական հարուստ է եւ կը վկայէ շարք մը մեծ նախագիծերու իրականացման մասին:
Գոհունակութիւն յայտնելով Հայաստանի եւ Իրանի միջեւ ձեւաւորուած աւանդական դարաւոր բարեկամութեան
վրայ հիմնուած փոխադարձ շահաւէտ համագործակցութեան բարձր մակարդակին համար` Սարգսեան
եւ Ռուհանի ընդգծեցին այդ համագործակցութիւնը նոր եւ աւելի բարձր հանգրուանի հասցնելու
անհրաժեշտութիւնը: Զրուցակիցները անդրադարձան նաեւ շրջանային խնդիրներուն, մասնաւորաբար`
Լեռնային Ղարաբաղի տագնապի լուծման բանակցային հոլովոյթի ներկայ վիճակին: Սերժ Սարգսեան
եւ Հասան Ռուհանի ջերմութեամբ յիշեցին ազգային ապահովութեան խորհուրդներու քարտուղարներու
մակարդակով իրենց հանդիպումները եւ պատրաստակամութիւն յայտնեցին նոյն ոգիով աշխատելու
հայ-իրանական համագործակցութեան խորացման ուղղութեամբ: